 |
РОДНЫЯ ВОБРАЗЫ
|
|
Вобразы мілыя роднага краю,
Смутак і радасьць мая!..
Якуб Колас
|
|
|
|
|
|
|
|
|
|
І
Не бушуюць мітынгі.
Не віруе плошча.
Сьцягі размаітыя
Вецер не палошча.
Можа, з Божай міласьці
Адышла мітрэнга?
Не. Байцы стаміліся.
Перадышка трэба.
Мудрацы ў праплешынах,
Тон узяўшы роўны,
Грунт кладуць палепшаны
Пад Закон Асноўны.
А гэроі нацыі
У галодных чэргах.
З фразы камбінацыі
Твораць невычэрпна.
«Покуль край ня выпетраў
На свабодных дулях –
Трон сюды са скіпетрам!
Заступай, татуля!
Хоць сабе карычневы,
Хоць сабе чырвоны,–
Заганяй апрычнінай
Зноў нас у загоны!.. »
II
Дзень імгліцца сьнежаньскі.
Без душы мяцежнай
Плошча Незалежнасьці
Чуецца залежнай.
Дзень празяб да дрыжыкаў.
Сьцюжна. Сівер зімны.
У чаканьні «пыжыкаў»
Дрэмлюць лімузіны.
З правымі і зь левымі
Не знайшоўшы ладу,
Інвалід разгневаны
Выйшаў з Дома ўраду.
У кішэнях порацца –
Пуста! Ні цыгаркі!
Нават дыму з горычы
Не глыне паўчаркі.
Лоб у шрамах хмурачы,
Сьціснуў кій у пальцах:
Можа, дзе акурачак
Знойдзем на асфальце?..
1992
|
|
|
|
Падабаецца
Не падабаецца
|
|
|
2009–2020. Беларусь, Менск.
|
|
|
